January 21, 2018 | By: গীতাৰ্থ বৰদলৈ

২০১৭ বৰ্ষৰ অসমীয়া গান


সততে অভিযোগ উঠে যে ভাল অসমীয়া গীততকৈ ‘সস্তীয়া’ গীতৰ চাহিদা বেছি। শ্ৰোতাৰ ৰুচি আৰু জনপ্ৰিয়তাৰ মাপকাঠিৰে কেতিয়াবা ভাল আৰু বেয়াৰ মাজৰ সীমাডাল ধূসৰ হৈ পৰে। মই বেয়া বুলি ভবা গীতটোৱে আন হাজাৰজনক আনন্দ প্ৰদান কৰিব পাৰে, বিহুৰ অনুষ্ঠানত তাকে উপভোগ কৰি টিট্‌কাৰি মাৰিবলৈ সুযোগ দিব পাৰে। ইউটিউবত সৰ্বাধিক প্লে’ হোৱা অসমীয়া গীতৰ তালিকা চালে পিউৰিষ্টসকলে নাক কোঁচাব পৰা বহু গীত ওলাব। কিন্তু বিগত বছৰটোৱে এটা কথা প্ৰমাণ কৰিলে যে “ভাল পোৱা যদি ঘৰতে, মালপোৱা খাই থাকোঁতে”ৰ দৰে গীতৰ কথা যিমানে নোলাওক, “মায়াময় জোনাক, বোৱতী নদী, নিস্তেজ সময়, সিপাৰত তুমি”ৰ দৰে শাৰীও নিগৰিত হৈ থাকিব। ২০১৭ চনৰ মোৰ ভাল লগা কেইটামান অসমীয়া গীতৰ তালিকা দিলোঁ। বেছিভাগ সকলোৱে চাগে শুনিছেই, কেইটামান নাই শুনা যদি শুনি চাওক। হয়তো আপোনাৰো ভাল লাগিব পাৰে। ক্ৰমিক সংখ্যাবোৰেৰে মোৰ ভাল লগাৰ ক্ৰম বুজোৱা নাই।
(গীতবোৰৰ ইউটিউব প্লে’লিষ্ট: https://www.youtube.com/playlist…)

১) মাজুলী
কথা: শান্তনু ৰৌমুৰীয়া
সুৰ/কণ্ঠ/সংগীত: নীলোৎপল বৰা

শান্তনু ৰৌমুৰীয়াৰ কথা, নীলোৎপল বৰাৰ সংগীত আৰু কণ্ঠই গীতটোক অতি উচ্চ স্থান দিছিলেই, অনিৰুদ্ধ বৰুৱাই পৰিচালনা কৰা ভিডিঅ’ই তাক এক অনন্য পৰ্যায়লৈ লৈ গ’ল। “বাৰিষাৰে গধূলি, থাকিবনে এইবেলি, নদীখনি মনে মনে শুই”। বাৰে বাৰে শুনি থাকিব পৰা এটা গীত। বাৰে বাৰে চাই থাকিব পৰা কিছুমান দৃশ্য। অসমৰ কোনো এখন ঠাইক বিশ্ববাসীৰ আগত দাঙি ধৰিবলৈ ইয়াতকৈ ভাল চেষ্টা হয়তো আগতে হোৱা নাই।


২) আকাশ সোণোৱালী
কথা: ড
° সান্ত্বনা বৰদলৈ
সুৰ/কণ্ঠ: ৰূপম ভূঞা
সংগীত: অনুৰাগ শইকীয়া

“মাজ ৰাতি কেতেকী” মোৰ বাবে ২০১৭ বৰ্ষৰ শ্ৰেষ্ঠ অসমীয়া ছবি আছিল। ছবিখনত এটাই গীত, কিন্তু মন, মগজু শাঁত পেলাব পৰা গীত। পৰিচালিকা ড°সান্ত্বনা বৰদলৈৰ কলমৰ পৰা ওলোৱা কোমল কোমল শব্দবোৰ ৰূপম ভূঞা আৰু অনুৰাগ শইকীয়াই সুমধুৰ কণ্ঠ, সংগীতেৰে বান্ধি এক অপূৰ্ব সৃষ্টিৰ জন্ম দিলে। আৰম্ভণিৰ অংশত সুহুৰিৰ প্ৰয়োগ আকৰ্ষণীয়। “আকাশ সোণোৱালী, উমাল-উদাৰ, ৰ’দৰঙী চিলাবোৰে তাতে মেলে প্ৰেমৰ পোহাৰ”। গীতটোৰ চিত্ৰায়ণো আছিল অতি আকৰ্ষণীয়। 


৩) তুহু দীন তাৰণ
কথা: ৰাধানাথ ফুকন
সুৰ: পংকজ শৰ্মা
কণ্ঠ: অভিশ্ৰুতি বেজবৰুৱা

১৯০৫-০৬ চনত ৰাধানাথ ফুকনে লিখা গীতটোৱে অভিশ্ৰুতি বেজবৰুৱাৰ কণ্ঠত প্ৰাণ পাই উঠিছে। সহযোগ কৰিছে দৰঙৰ জগন্নাথ বৰাৰ ওজাপালি দলে। নতুন প্ৰজন্মক অসমৰ সংস্কৃতিৰ লগত চিনাকী কৰাই দিবলৈ এনে প্ৰচেষ্টা বাৰে বাৰে হোৱা উচিত। সত্ৰ, দৌলোৎসৱক সামৰি কৰা চিত্ৰায়ণ অতি মনোমোহা (ইয়াৰ লগতে দুবছৰ আগৰ কল্পনা পাটোৱাৰী, পাপনৰ কণ্ঠৰ “মুক্তি” গীতৰ ভিডিঅ’টো আকৌ এবাৰ চাব পাৰে)।


৪) জলপ্ৰপাত
কথা/সুৰ/কণ্ঠ: শংকুৰাজ কোঁৱৰ
সংগীত: অভি শইকীয়া

এদিন ইউটিউব খুঁচৰি থাকোঁতে “জলপ্ৰপাত” নামৰ গীত এটিত চকু পৰিল। শুনি শিহঁৰিত হৈ পৰিলোঁ। অসমীয়া গানত EDM-প্ৰয়োগ খুব পুৰণা নহয়। নতুন গায়ক শংকুৰাজৰ মোটা কণ্ঠ আৰু অভি শইকীয়াৰ ইলেক্ট্ৰনিক সংগীতে শ্ৰোতাক নতুন সোৱাদ দিয়াটো নিশ্চিত। গীতৰ কথাও অগতানুগতিক- “সুৰ মালহাৰ ৰাগৰ তানে, বাৰিষাৰ বাতৰি আনে, লাজুকী দুবৰি বনে, ৰূপোৱালী ৰহণ সানে, দেখি মন বিভোৰ, বাজি উঠে নুপুৰ, খালি ভৰিৰে গছকি তৰালী, শব্দ শিথিল, হাঁহিও জিলিকিল, নাচোনতে মন উন্মাদিনী….”


৫) ন যুঁজৰ ৰণুৱা
কথা: ইবছন লাল বৰুৱা
সুৰ/কণ্ঠ: জয় বৰুৱা

শুই থকা অসমীয়াৰ চেতনা জাগৃত কৰিবলৈ আহ্বান “ন যুঁজৰ ৰণুৱা”। ইবছন লাল বৰুৱাৰ শক্তিশালী কলম আৰু জয় বৰুৱাৰ ভিন্ন কণ্ঠৰ পুনৰ এক উৎকৃষ্ট মিশ্ৰণ। কোচসকলৰ গৌৰৱময় ইতিহাসত আলোকপাত কৰি কলা-সংস্কৃতিৰ উমান দিয়া গীতটোৱে জাতিটোক ভেদাভেদ পাহৰি যুঁজিবলৈ প্ৰেৰণা দিব।


৬) কি বেদনাতে
কথা: মৈত্ৰী পাটৰ/শংকুৰাজ কোঁৱৰ
সুৰ/কণ্ঠ: শংকুৰাজ কোঁৱৰ

“বাৰ্ত্তালাপ” নামৰ প্ৰকল্পৰ সংগীত প্ৰকল্প এটাৰ প্ৰথম গীত “কি বেদনাতে”। মৈত্ৰী পাটৰৰ কবিতা এটিৰ ওপৰত আধাৰিত গীতক শংকুৰাজে নিজৰ সুকীয়া কণ্ঠৰ স্পৰ্শ দিছে। আৰম্ভণিৰ কী’বৰ্ড অংশই গীতটোৰ মুড স্থাপন কৰিছে। তাৰ পাছত আৰম্ভ হয় “কি বেদনাতে দুচকু সেমেকে, কি ভাৱনাতে দুবাহু উমলে, কি কি মৰীচিকা খেদি হাবাথুৰি খাই আজি ৰৈ আছোঁ মই….”। যোৱা মাহত মুক্তি লাভ কৰা গীতটোৰ ভিডিঅ’টো বিমূৰ্ত আৰু সুন্দৰ।


৭) জোন গলা
কথা: জিতুমণি কলিতা
কণ্ঠ/সংগীত: মৃণাল ৰাভা

প্ৰথমবাৰ শুনিলে বহুতে হয়তো পাপনৰ গীত বুলি ভুল কৰিব। মৃণাল ৰাভাৰ দৰদী কণ্ঠৰ পাপনৰ সৈতে সাদৃশ্য আছে, কিন্তু অনুনাসিক উচ্চাৰণ কম। আবেগ ঢালি গোৱা “জোন গলা জোনাকী ৰাতি, দুচকুতে সপোন আঁকি” মাথোঁ এবাৰ শুনিলে হেঁপাহ নপলায়। কেমেৰাৰ কামো অতি সুন্দৰ। 
 

৮) এমুঠি
কথা: বিদ্যুৎ কটকী
সুৰ: অনুৰাগ শইকীয়া
সংগীত: নীলোৎপল বৰা
কণ্ঠ: জুবিন গাৰ্গ

নতুন অসমীয়া চলচ্চিত্ৰ “শৈশৱতে ধেমালিতে”ৰ গীত “এমুঠি”। “ভগ্ন প্ৰাচীৰ আজি তাৰুণ্যৰ বাটে-পথে চৌদিশে, পৰাজিত লুণ্ঠিত জীৱাত্মাৰ সমদল, মুৰ্চিত আজি শত কলিজাৰ দাবানল” আৰম্ভণিয়ে জুবিনৰ “ৰুদ্ধ আকাশ, ক্ৰুদ্ধ বতাহ”হৈ মনত পেলাই দিলে। তাৰ পাছতে সমবেত কণ্ঠৰ আৰোহণ। জুবিন গাৰ্গৰ কণ্ঠ, অনুৰাগ শইকীয়া, নীলোৎপল বৰাৰ সংগীতে শ্ৰোতাৰ মন-মগজু কঁপাই তুলিব।

৯) অনুৰণ
কথা/সুৰ/সংগীত: জিম অংকন ডেকা
কণ্ঠ: ৰূপম ভূঞা

থাওকতে পোৱা অভিধানত “অনুৰণ” শব্দটো নাই, “অনুৰণন”হে আছে। জিম অংকন ডেকাই গীতৰ প্ৰয়োজনত শব্দটো চুটি কৰি ব্যৱহাৰ কৰিলে নেকি নাজানো। শেষ ফল অৱশ্যে অতি শ্ৰুতিমধুৰ। গীতটো ২০১৬ বৰ্ষতে মুক্তি লাভ কৰিছিল যদিও নূন্যতম বাদ্যযন্ত্ৰৰ ব্যৱহাৰেৰে লাইভ, আন্‌প্লগ্‌‌ড ভাৰ্ছন এটা যোৱা বছৰ মুক্তি দিয়া হয়। ৰূপম ভূঞাৰ গায়কীৰ কথা ক’বলৈ ভাষা নাই! “সোঁৱৰণীৰ বতাহজাকত তোমাৰেই সুবাস, সুধিছিলোঁ নিৰ্জনতাক পামনে কোনো আশ্বাস….”। Eb কৰ্ডৰ কোমল মুডত ৰূপম ভূঞাৰ কণ্ঠ আৰু গীতৰ সুৰ নিৰ্জনতাত নদীৰ দৰেই বৈ যায়।

১০) জীৱনে ওলমে-জামলে
কথা: শান্তনু ৰৌমুৰীয়া
সুৰ/সংগীত: তৰালী শৰ্মা
কণ্ঠ: সিদ্ধাৰ্থ হাজৰিকা

অহা মাহত মুক্তি লাভ কৰিবলগীয়া “কেলেণ্ডাৰ” চলচ্চিত্ৰৰ গীত। শান্তনু ৰৌমুৰীয়াৰ “মনৰে চিকমিক বৈয়ামত জিকমিক সপোনৰ মুকুতা ভৰি আহে” শাৰীয়ে মুহূৰ্ততে আকৃষ্ট কৰে। এই গীতৰ দৰে তৰালী শৰ্মাই “মাৰ্কশ্বিট” ছবিতো মেণ্ডোলিনৰ বুদ্ধিদীপ্ত প্ৰয়োগ কৰা মনত পৰে। সিদ্ধাৰ্থ হাজৰিকাই প্ৰাণ ঢালি গীতটো গাইছে।

১১) ভাটিয়ালী সপোন (https://www.youtube.com/watch?v=fQsVDTOgjBM)
কথা/সুৰ/কণ্ঠ: মৈত্ৰী পাটৰ
সংগীত: শংকুৰাজ কোঁৱৰ 

“বাৰ্ত্তালাপ”ৰ দ্বিতীয় গীতৰ কথা আৰু কণ্ঠ মৈত্ৰী পাটৰৰ নিজা। ছাঁ-পোহৰ, লয়লাস নৃত্য আৰু ৰঙৰ খেলাৰ বিমূৰ্ত চিত্ৰায়ণক গায়িকাৰ মিঠা কণ্ঠই গতি দিছে। “কি বেদনাতে” আৰু “ভাটিয়ালী সপোন” সম্পূৰ্ণ বেলেগ সৃষ্টি, কিন্তু ভিডিঅ’ দুটা একেডাল সূতাৰে বন্ধা। আশা কৰোঁ তেওঁলোকৰ এই প্ৰকল্পই আগকৈও এনে অনন্য গীত আমাক দি যাব।
১২) কোৱা
কথা: ইবছন লাল বৰুৱা
সুৰ/কণ্ঠ: জয় বৰুৱা

ইবছন লাল বৰুৱা আৰু জয় বৰুৱা লগ লাগিলে বিশেষ সৃষ্টি হোৱাটো খাটাং। “কোৱা”ও ইয়াৰ ব্যতিক্ৰম নহয়। “কোৱা মনৰে কথা, কাণে কাণে কৈ যোৱানা, মনে বিচাৰে কাষত, নুবুজা কিয় বুজানা” বুলি গাওঁতে যেন আনে শুনাটো বিচৰা নাই। খ্যাতিসম্পন্ন নৃত্যশিল্পী শিল্পীকা বৰদলৈয়েও অভিনয় কৰা সমুজ্জ্বল কাশ্যপৰ ক’লা-বগা চিত্ৰায়ণ গীতটোৰ পৰিপূৰক।

১৩) অ’ মা
কণ্ঠ: জুবিন গাৰ্গ

আৱাহন থিয়েটাৰৰ গীত “অ’ মা”য়ে “তাৰে জমীন পৰ”লৈ মন পেলাই দিয়ে। জুবিন গাৰ্গে সমস্ত আবেগ ঢালি গোৱা শব্দবোৰ হৃদয়ৰ অভ্যন্তৰ প্ৰৱেশ নকৰাটো চাগে অসম্ভৱ।


১৪) উভতি আকৌ
কথা/সুৰ/কণ্ঠ: অংগৰাগ মহন্ত

অংগৰাগ মহন্তৰ নতুন এলবাম “নতুন পোহৰ”এ “জোনাকী ৰাতি” বা “চিনাকী-অচিনাকী”ৰ দৰে মোৰ মন জয় নকৰিলে, ৰাইজেও চাগে আগৰ দৰে আদৰি নল’লে। ভাল লগা গীতৰ ভিতৰত এটা “উভতি আকৌ”। পোৱা-নোপোৱাৰ দোমোজাত থকা ভাৱ পাপনে বেজাৰৰ গায়কীৰে সুন্দৰকৈ প্ৰকাশ কৰিছে।

১৫) ধুনীয়া জোন
কথা আৰু সংগীত- দিগন্ত ভাৰতী
কণ্ঠ- নাহিদ আফ্ৰিন

নহিদৰ কণ্ঠ আৰু গায়কীৰ লগত সকলোৱেই পৰিচিত। দিগন্ত ভাৰতীৰ মিঠা শব্দৰ মালা নাহিদে সুন্দৰকৈ পৰিবেশন কৰিছে। এই গীতৰ বাবে নাহিদে কিছুদিন আগতে প্ৰাইড ইষ্ট শ্ৰেষ্ঠ গায়িকাৰ সন্মানো লাভ কৰিছে।

১৬) কবিতা কেনেকৈ লিখে
কথা: ইবছন লাল বৰুৱা
সুৰ: পাৰ্থ প্ৰতীম
কণ্ঠ: জুবিন গাৰ্গ, সুবাসনা দত্ত
“কোঁৱৰপুৰৰ কোঁৱৰ” চিনেমাখন ভাল মনোৰঞ্জনকাৰী চিনেমাই আছিল, কিন্তু হিট্ নহ’ল। হিট্ হ’ল চিনেমাখনৰ গীতবোৰ বিশেষকৈ “কবিতা কেনেকৈ লিখে”। গীতৰ কথাক জুবিন গাৰ্গ আৰু সুবাসনা দত্তৰ কণ্ঠই এনে এক মাত্ৰা দিছে যে কবিতা নিলিখা মানুহেও কবিতা লিখি পেলাব। নায়িকাৰ “ডেম্‌ফুল” সংলাপেৰে আৰম্ভ হোৱা চিত্ৰায়ণো সুন্দৰ। চিনেমাখনৰ আন গীত জয় বৰুৱাৰ কণ্ঠৰ “টুকুৰা টুকুৰ কৰি” আৰু পাপনৰ “হাঁহি এটি”ও শ্ৰুতিমধুৰ।

১৭) আকুলি বিকুলি
কথা/সুৰ/সংগীত: জুবিন গাৰ্গ
কণ্ঠ: জুবিন গাৰ্গ, নাহিদ আফ্ৰিন

“প্ৰিয়াৰ প্ৰিয়”ৰ সংগীতে মোক সন্তুষ্ট কৰা নাছিল। “হিয়া দিয়া নিয়া”ৰ পৰা জুবিন গাৰ্গৰ চলচ্চিত্ৰ সংগীতৰ গ্ৰাফডাল যেন ত্ৰমাৎ তলকৈহে আহি আছে (দীনবন্ধুৰ দৰে দুই-এটা উঠন নথকাও নহয়)। তাৰ মাজতে এটা ভাল লগা গীত আকুলি-বিকুলি। নাহীদৰ গায়কী প্ৰশংসনীয়। জুবিন দাৰ কথা নক’লোঁৱেইবা। “এতিয়া বুকুত তুমি জোন হৈ” বুলি গোৱা হাই স্কে’লৰ অংশ জুবিন দাৰ বাহিৰে বেলেগ গায়কৰ কণ্ঠত চাগে ভাল নালাগিব।


১৮) এতিয়াৰ সময়
কথা: জুবিন গাৰ্গ
সুৰ/কণ্ঠ: নীলোৎপল বৰা

“মাজুলীৰ” পাছত “পঞ্চম” এলবামৰ আন এটা ভাল লগা গীত। গীতৰ ভাষা, পৰিবেশন প্ৰথম শ্ৰেণীৰ। “এন্ধাৰো আহিল, পোহৰো আহিল, মোৰ সুৰ কেনিনো বাগৰিল…”। ষ্টপ্ মোচন শৈলীৰে কৰাৰ দৰে অপূৰ্ব চিত্ৰায়ণ খুব সম্ভৱ আন অসমীয়া গীতত হোৱা নাই। 


১৯) লাচিতে কৈছোঁ মই
কণ্ঠ- নীল আকাশ, কুসুম কৈলাশ
“ন যুঁজৰ ৰণুৱা”ৰ দৰে জাতীয়তাবাদী ভাৱধাৰাৰ আন এটি গীত। মই সাধাৰণতে পছন্দ নকৰা নীল আকাশ আৰু কুসুম কৈলাশে লাচিতৰ শৌৰ্য-বীৰ্য বলিষ্ঠ কণ্ঠ, ‘ৰেপ’ আৰু যুদ্ধৰ পৰিবেশৰ সংগীতেৰে এইবাৰ মন জয় কৰিলে।

২০) মনৰ মৰম
কথা: কেশৱ দত্ত
সুৰ/সংগীত: ৰূপম তালুকদাৰ
কণ্ঠ: গায়ত্ৰী হাজৰিকা

গয়ত্ৰী হাজৰিকাৰ গীতৰ সোৱাদ যদি আগতে পোৱা নাই তেন্তে ইউটিবত “Best of Gayatri Hazarika” বুলি সন্ধান কৰি চাব পাৰে। ৰূপম ভূঞাৰ দৰেই তেখেতে কেৱল চিৰিয়াছ কামত মনোনিবেশ কৰিছে। “মন মোৰ উৰি ফুৰে”, “সৰা পাতে পাতে ফাগুন নামে” আদিৰ পাছত এইটোও তেখেতৰ এক অনুপম উপহাৰ।


শ্ৰদ্ধাপূৰ্বক উল্লেখ
এছাটি বতাহ: অভিশ্ৰুতি বেজবৰুৱা (https://www.youtube.com/watch?v=rzpOeDpA7eA&feature=youtu.be)
শুদ্ধ চিন্তা: নৱনীতা কলিতা (https://www.youtube.com/watch?v=AyeJvIs0kVo)
পাহৰি যোৱা: বৰ্ণালী কলিতা (https://www.youtube.com/watch?v=GyUJCIqNrNU)
দিন জ্বলে: জুবিন গাৰ্গ, জুবলী বৰুৱা (https://www.youtube.com/watch?v=pQvitFLU9uA)
ইমান সেমেকা কথাৰে: গায়ত্ৰী হাজৰিকা (https://www.youtube.com/watch?v=rOoFobGHCZ0)
ছবি অঁকা মানুহজনে: পাৰবীন হুছেইন (https://www.youtube.com/watch?v=JaFJoMDslL8)

শ্ৰেষ্ঠ শ্ৰাব্য সঁফুৰা: "অভিশ্ৰুতি" আৰু "পঞ্চম"।

October 28, 2017 | By: গীতাৰ্থ বৰদলৈ

জলাতংক ৰোগ আৰু মিল্‌ৱাকী প্ৰট'কল

      
এই কাহিনীৰ নায়িকা জিনা গিজি (ছবিৰ উৎস youthhealthmag.com)
       ফণ্ড ডু লেক আমেৰিকা যুক্তৰাষ্ট্ৰৰ ৱিছ্‌কন্সিন প্ৰদেশৰ এখন সৰু নগৰ। পোন্ধৰ বছৰীয়া জিনা গিজি তাৰে ছেইণ্ট মেৰী স্প্ৰিংছ হাইস্কুলৰ ছাত্ৰী। ২০০৪ চনৰ ১২ ছেপ্টেম্বৰ দেওবাৰে জিনাই মাকৰ লগত নগৰৰে ছেইণ্ট পেট্ৰিক গীৰ্জালৈ গৈ প্ৰাৰ্থনাৰ বাবে আসন গ্ৰহণ কৰিলে। প্ৰাৰ্থনা শেষ হ’বলৈ অলপ সময় থাকোঁতে বাদুলী এটা আহি গীৰ্জাৰ ভিতৰত উৰি ফুৰিবলৈ ল’লে। এপাকত মানুহৰ কোবত বাদুলীটো আহি তলত পৰিলহি। জীৱপ্ৰেমী জিনাই ভাবিলে বাদুলীটো বাহিৰৰ গছ এজোপাত এৰি দিয়াই ভাল। এই বুলি বাদুলীটো হাতত তুলি দুৱাৰখন ঠেলা মাৰি খুলোঁতেই বাদুলীটোৱে জিনাৰ বাওঁহাতৰ তৰ্জনী আঙুলিত কামুৰি দিলে। বাদুলীটোৱে নেৰা দেখি জিনাই আজুৰি আনি তাক ওচৰৰ গছলৈ দলিয়াই দিলে আৰু ভিতৰলৈ আহি পুনৰ নিজৰ আসনত বহিলহি। জিনাৰ ভাষাতে ক’বলৈ গ’লে বাদুলীটোৱে কামোৰা সেই ত্ৰিছ ছেকেণ্ডে তাইৰ জীৱন চিৰদিনৰ বাবে সলাই পেলালে। ঘৰলৈ আহি জিনাই আঘাত পোৱা ঠাই হাইড্ৰ’জেন পেৰ’ক্সাইডেৰে ধুই দিলে আৰু ঘটনাটো পাহৰি গ’ল।


        ১৩ অক্টোবৰৰ পৰা জিনাৰ গা বেয়া হ’বলৈ ধৰিলে। দুৰ্বলতা, বমি, দ্বি-দৃষ্টি, অভাৰসাম্য আদি লক্ষণৰ বাবে জিনাক স্থানীয় ছেইণ্ট এগ্নেছ চিকিৎসালয়ত ভৰ্তি কৰোৱা হ’ল। জিনাৰ হঠাতে বাদুলীয়ে কামোৰা কথাটো মনত পৰাত মাকক ক’লে। মাকে স্নায়ুৰোগ বিশেষজ্ঞজনক জনোৱাত তেওঁ আহি আঙুলিটো চালে। ক্ষতস্থান ঠিক হৈ পৰা দেখি তেওঁ বিশেষ গুৰুত্ব নিদিলে। পাছদিনাৰ পৰা জিনাৰ অৱস্থা কাহিল হৈ পৰিল। সকলো পৰীক্ষা-নিৰীক্ষা কৰোৱা হ’ল। ৰোগ ধৰিব পৰা নাই। শিশু বিশেষজ্ঞ ড° হাৱাৰ্ড ধনাউ জিনাক চাবলৈ আহিল। মাজে তেওঁক বাদুলীৰ কথাটো জনোৱাত ড° হাৱাৰ্ডে জলাতংক ৰোগ বুলি সন্দেহ কৰিলে। খৰধৰকৈ মিল্‌ৱাকীৰ শিশু চিকিৎসালয়ৰ লগত যোগাযোগ কৰা হ’ল। ১৮ অক্টোবৰত জিনা সেই চিকিৎসালয়ত ভৰ্তি হ’ল।

        
জিনাৰ ছাল আৰু তেজৰ নমুনা জৰ্জিয়াৰ ছেণ্টাৰ ফৰ ডিজিজ কণ্ট্ৰ’ল এণ্ড প্ৰিভেন্‌চনলৈ পঠিয়াই দিয়া হ’ল। জিনাৰ জলাতংক ৰোগ নিশ্চিত হ’ল। জিনাৰ মাক-দেউতাক ভাগি পৰিল। জলাতংক মানেই মৃত্যু। বলিয়া মৰণ। চকুৰ সন্মুখতে নিজৰ সন্তান লাহে লাহে মৰণপথলৈ আগুৱাই যোৱানো কেনেকৈ সহ্য কৰিব। শিশু সংক্ৰামক ৰোগৰ বিশেষজ্ঞ ড° ৰড্‌নী ৱিল’বীয়ে হাৰ মানিব নুখুজিলে। জিনাৰ ওপৰত তেওঁ আগতে কেতিয়াও নকৰা এটা পৰীক্ষামূলক চিকিৎসা পদ্ধতি চেষ্টা কৰি চাবলৈ ঠিৰাং কৰিলে। ডুবিবলৈ ধৰা মানুহে খেৰ-কূটাকো খামুচি ধৰাৰ দৰে জিনাৰ মাক-দেউতাকে সন্মতি দিলে। যিহেতু জলাতংক ৰোগে কেন্দ্ৰীয় স্নায়ুতন্ত্ৰত ৰাসায়নিক খেলিমেলিহে লগায়, ড° ৱিল’বীৰ দলে ভাবিলে যে মগজুক যদি বিশ্ৰাম দিয়া হয় তেন্তে শৰীৰৰ নিজা প্ৰতিৰক্ষা প্ৰণালীয়ে লাহে লাহে ৰোগৰ মোকাবিলা কৰিব পাৰিব। সেইমতেই গিজিক মিডাজ’লাম আৰু কেটামিন ঔষধৰ এটা মিশ্ৰণ দি কৃত্ৰিম সুপ্ত অৱস্থালৈ অনা হ’ল আৰু এণ্টিভাইৰেল ঔষধ ৰিবাভিৰিন আৰু এমেণ্টাডিন প্ৰয়োগ কৰা হ’ল। সকলোৱে ৰুদ্ধস্বাসেৰে জিনাৰ জীৱন-মৃত্যুৰ খেলখনৰ ফলাফললৈ অপেক্ষা কৰিলে।

           
ছদিনৰ পাছত স্নায়ুৰসৰ পৰীক্ষা কৰি দেখা গ’ল যে জিনাই শৰীৰে ৰেবীজ প্ৰতিদেহ (antibody) উৎপন্ন কৰিছে! সাতদিনৰ পাছত ড° ৱিল’বীয়ে জিনাক লাহে লাহে সুপ্তাৱস্থাৰ পৰা মুকলি কৰিলে। মগজুৰ গুৰুতৰ ক্ষতি হোৱাৰ আশংকা জিনাই অমূলক প্ৰমাণ কৰিলে। শিশুক শিকোৱাৰ দৰে তাইকো থিয় দিয়া, খোজ কঢ়া আদিৰ প্ৰশিক্ষণ দিয়া হ’ল। জিনা ক্ৰমাৎ আৰোগ্য হৈ আহিবলৈ ধৰিলে। ভৰ্তি হোৱাৰ ৭৬ দিনৰ পাছত ২০০৫ চনৰ ১ জানুৱাৰীত চিকিৎসকে জিনাক ঘৰলৈ যোৱাৰ অনুমতি দিলে। ঘটনাৰ আগত বা পাছত প্ৰতিষেধক নোলোৱাকৈ জলাতংক ৰোগৰ পৰা আৰোগ্য লাভ কৰা জিনা বিশ্বৰ প্ৰথম ব্যক্তি। ১৩১ দিনৰ পাছত চিকিৎসকৰ ওচৰলৈ পৰীক্ষাৰ বাবে যাওঁতে জিনাৰ কথা কোৱা আৰু খোজ কঢ়াত অসুবিধা প্ৰত্যক্ষ কৰা হৈছিল। কিছু স্নায়ৱিক দুৰ্বলতা থাকিলেও ২০১১ চনত জিনাই জীৱবিদ্যাৰ গ্ৰেজুৱেচন সম্পূৰ্ণ কৰে। এই চিকিৎসা পদ্ধতিবিধো “মিল্‌ৱাকী প্ৰট’কল” বা “ৱিছ্‌কন্সিন প্ৰট’কল” নামেৰে বিখ্যাত হৈ পৰিল।

              বছৰি প্ৰায় ৫৫,০০০ লোকৰ জলাতংক ৰোগত মৃত্যু হয়। আগতে ভবা হৈছিল যে প্ৰতিষেধক নোলোৱা ব্যক্তিৰ জলাতংক হ’লে মৃত্যু ১০০% নিশ্চিত। কিন্তু জিনা গিজিৰ ঘটনাই দেখুৱালে যে একেবাৰে আশা এৰি দিয়াৰ প্ৰয়োজন নাই। ২০০৪ চনৰ আগলৈকে কেৱল পাঁচজন জলাতংক ৰোগীৰ মৃত্যু নোহোৱাৰ তথ্য আছে (তাৰ ভিতৰত ভাৰতৰো এগৰাকী ৰোগী আছে)। ২০১৭ চনৰ জুন মাহলৈকে এই সংখ্যা পোন্ধৰজনলৈ বাঢ়িছে। মিল্ৱাকী প্ৰট’কলৰো এতিয়ালৈকে তিনিবাৰ সংশোধন কৰা হৈছে। ড° ৱিল’বীয়ে ২০০৯ চনত প্ৰকাশ কৰে যে প্ৰথম প্ৰট’কল অনুসৰি চিকিৎসা কৰা ২৫ জন লোকৰ দুজনৰ প্ৰাণৰক্ষা পৰিছে আৰু সংশোধিত প্ৰট’কল মতে চিকিৎসা কৰা ১০ জন লোকৰ দুজনৰ প্ৰাণৰক্ষা হয় (২০১৩ চনৰ এখন গৱেষণা পত্ৰিকাত অৱশ্যে এই তথ্য ভুল বুলি কোৱা হৈছে)। ভাৰততো ২০১৬ চনৰ জানুৱাৰীত গোৱালিয়ৰত এজন জলাতংক ৰোগীৰ এই পদ্ধতি অনুসৰি চিকিৎসা কৰা হৈছিল, কিন্তু চাৰি দিনৰ পাছতে তেওঁৰ মৃত্যু হয়। পেৰুত কৰা এটা গৱেষণাত ধৰা পৰে যে জলাতংকৰ প্ৰতিষেধক নোলোৱাকৈও মানুহৰ দেহত ভাইৰাছবিধৰ প্ৰতিদেহ উৎপন্ন হ’ব পাৰে। মানৱ জলাতংকৰ কোনো প্ৰমাণিত চিকিৎসা নাই বুলি ২০১৩ চনত বিশ্ব স্বাস্থ্য সংস্থাৰ এখন আলোচনা চক্ৰত স্পষ্ট কৰি দিয়া হয়।

            
মিল্‌ৱাকী প্ৰট’কলৰ মাজেৰে জিনা বা আন ৰোগীয়ে আৰোগ্য লাভ কৰাৰ কাৰণ বিতৰ্কৰ আৱৰ্তত। কোনো কোনোৰ মতে ভাইৰাছবিধৰ দুৰ্বল প্ৰকাৰৰ দ্বাৰা সংক্ৰমিত হ’লে আৰোগ্য লাভৰ সুযোগ বেছি। আন কোনোৰ মতে ব্যক্তিবিশেষৰ জিনীয় বা প্ৰতিৰোধমূলক উপাদানে আৰোগ্যত প্ৰভাৱ পেলাব পাৰে। নতুন নতুন চিকিৎসা পদ্ধতি পৰীক্ষা নকৰি মিল্‌ৱাকী প্ৰট’কলকে সাৱটি থকাৰ বাবে স্বাস্থ্যকৰ্মীসকলক সমালোচনা কৰা হয়। প্ৰথম মিল্‌ৱাকী প্ৰট’কলৰ কেৱল কেটামিন আৰু মিডাজলামহে বৰ্তমানৰ সংশোধনীত ব্যৱহাৰ কৰা হয়। প্ৰচলিত ICU চিকিৎসা প্ৰণালীত এই ঔষধ দুবিধ এনেয়ো ব্যৱহাৰ নোহোৱা নহয়। মিল্‌ৱাকী প্ৰট’কল অনুসৰি প্ৰাণ ৰক্ষা পৰা ঘটনাবোৰ কাক্‌তালীয় বুলি ধৰিলেও এই কথা নিশ্চিত যে ড° ৱিল’বীৰ প্ৰচেষ্টাই ৰেবীজৰ জোৰদাৰ চিকিৎসা সম্পৰ্কে চিকিৎসক আৰু গৱেষক সমাজৰ মাজত সজাগতাৰ সৃষ্টি কৰিলে। আন ভাইৰাছজনিত ৰোগৰ দৰে ৰেবীজ বা বলিয়া মৰণো এতিয়া ১০০% ঘাটক নহয়।


(বিভিন্ন ইণ্টাৰনেট সূত্ৰৰ সহায় লৈ)